प्रस, वीरगंज, २९ साउन/
वीरगंजको नारायणी अस्पतालमा बिहीवार बिहान मृत्यु भएका बाराका दुईजनामा कोरोना सङ्क्रमण पुष्टि भएको छ ।
बारा जिल्ला प्रसौनी गापाका ६५ वर्षीय पुरुष र जीतपुरसिमरा उपमहानगरका ५० वर्षीय पुरुषको आज बिहान निधन भएको र उनीहरूको पिसिआर रिपोर्ट पोजेटिभ आएको डा उदयनारायण सिंहले बताए । मृतकमध्ये ६५ वर्षीय पुरुष बारा जिल्लाको तत्कालीन प्रसौनी गाविसका पूर्वअध्यक्ष दिनेशप्रसाद कलवार हुन् ।
कलवारलाई चार दिनअघि ज्वरो लागेर नारायणी वयोधा अस्पतालमा भर्ना गरिएको थियो । त्यहाँ उनको अवस्था गम्भीर भएपछि अस्पतालले आइसियू र भेन्टिलेटरमा राखी उपचार नगरी बुधवार बिहान ४ बजे नारायणी अस्पतालमा रेफर गरेको थियो । ज्वरोको कारण कोरोना सङ्क्रमित हुन सक्ने आशङ्कामा पिसिआर परीक्षण नगरी भर्ना गरेको वयोधाले नारायणीमा रेफर गरेको अनुमान चिकित्सकले गरेका छन् ।
नारायणीमा पनि आइसियू, भेन्टिलेटर खाली नभएको भनेर कलवारको उपचार आकस्मिक कक्षमा गरिएको थियो । कोरोनाको लक्षण भएकोले आकस्मिक कक्षमा उनको स्वाब नमूना सङ्कलन गरिएको थियो । पिसिआर परीक्षण रिपोर्ट आउन नपाउँदै कलवारको बिहान ९ बजे निधन भएको कोभिड विशेष अस्पताल गण्डकका इन्चार्ज डा उदयनारायण सिंहले बताए । निधनपछि कलवारको रिपोर्ट पोजेटिभ आएको उनले बताए ।
यसैगरी, बिहीवारै नारायणी अस्पतालमा मृत्यु भएका अर्का बाराकै ५० वर्षीय पुरुषमा पनि कोरोना सङ्क्रमण पुष्टि भएको डा सिंहले बताए । उनी जीतपुरसिमरा उपमहानगर निवासी भएको बताइएको छ ।
