दीर्घरोगीलाई गापाको सहयोग जारी

प्रस, पंचगावाँ, ८ भदौ/
    पटेर्वासुगौली गाउँपालिका पर्सा जिल्लाका चौधवटै स्थानीय तहमा उदाहरणीय भएको छ।
    यो गापा दीर्घरोगीहरूलाई आर्थिक सहयोग गर्ने जिल्लामा पहिलो हो। गापाले वडास्तरमा शुरूदेखि दीर्घरोगीहरूलाई सहयोग गर्दै आएको छ। पहिलो वर्ष १५ हजार नगदबाट शुरू गरिएको यो अभियान अहिले बिरामीहरू वृद्धि भएसँगै दश हजारमा सीमित छ। स्थानीय तह गठनपछि गापाले रु १५ हजार दीर्घरोगीहरूलाई दिन शुरू गरेको थियो। दीर्घरोगीहरूमा पक्षघात, मस्तिष्कघात, अल्जाइमर, क्यान्सर, मिर्गौला, मुटुरोग, पार्किन्ससलगायतका बिरामीहरूको सङ्ख्या बढेपछि गापाले अहिले १० हजार रुपैयाँ प्रतिवर्ष उपलब्ध गराउँदै आएको निमित्त प्रमुख प्रशासकीय अधिकृत भुजेन्द्रप्रसाद यादवले बताए।
    दीर्घरोगीहरूका लागि यो रकम न्यून भएपनि गापाले उपलब्ध गराएकोमा स्थानीय खुशी छन्। थोरै भएपनि गापाले दीर्घरोगीहरूको लागि आर्थिक सहयोग गरेको उनीहरूको भनाइ छ। निमित्त प्रमुख प्रशासकीय अधिकृत यादवले चालू आवमा पनि दीर्घरोगीहरूलाई उपलब्ध गराउँदै आएको सहयोग जारी रहने बताए। स्वास्थ्य शाखा संयोजक जगन्नाथ साहले आव २०७४/७५ मा रु १५ हजारको दरबाट शुरू गरिएको यो सहयोग ३४ जनालाई उपलब्ध गराइएको र २०७५/७६ मा रु १० हजारका दरले  ४० जना तथा २०७६/७७ मा ३० जनालाई उपलब्ध गराइएको बताए।
    वडा नं ४ का क्यान्सर रोगपीडित योगेन्द्र चौधरीले आर्थिक सहयोग घाउमा मलमपट्टिसरह भएको बताए। उनले गापाको रकम न्यून भएपनि प्रयास सराहनीय भएको बताए। अन्य गापाको तुलनामा आफ्नो गापाले दीर्घरोगीहरूलाई थोरै भएपनि सहयोग गरेकोमा उनले खुशी व्यक्त गरे।