ज्यान मुद्दामा चारजना पक्राउ

प्रस, रौतहट, १२ असोज/
    गढीमाई नगरपालिका वडा नं ३ गम्हरिया पर्सा मुसरी टोल बस्ने सकल बैठाकी ३५ वर्षीया पत्नी मिन्त्रादेवी बैठाको हत्या आरोपमा चारजनालाई प्रहरीले पक्राउ गरेको छ।
    पक्राउ पर्नेमा गढीमाई नगरपालिका वडा नं ३ बस्ने ४० वर्षीय जमसैद मियाँ, सोही स्थान बस्ने वर्ष ३५ का दाउद मियाँ, वर्ष ३२ का जहरुद्दीन मियाँ भन्ने हारुन रसिद र वर्ष ४० का महमद इसराफुल मियाँ रहेका छन्।
    आज रौतहट जिल्ला अदालतबाट ज्यानसम्बन्धी कसूरमा ७ दिनको म्याद थप गरी अनुसन्धान भइरहेको जिप्रकाका प्रनाउ भरत श्रेष्ठले बताए। प्रारम्भिक अनुसन्धानमा अभियुक्तहरूले अपराध स्वीकार गरिसकेको प्रनाउ श्रेष्ठले बताए।
    गत भदौ १४ गते बिहान १० बजे  घाँस काट्न गएकी मिन्त्रा अबेरसम्म घर नफर्किंदा घरपरिवारका सदस्यहरूले खोजतलाश गर्दै जाँदा करीब ६ बजे गढीमाई नपा–३ समिउल्ला कवारीको उखुबारीमा अज्ञात व्यक्तिले घाँटी कसेको अवस्थामा लाश फेला परेको थियो।
    अनुसन्धानको क्रममा जमसैद मियाँका बुबा स्व अनवर हुसैनले लिएको ऋण चुक्ता गर्न नसक्दा अदालतमार्फत् नै सकार गरिलिएको जग्गामध्ये मृतक मिन्त्राका पति सकल बैठाले जग्गा किन्दा जमसैद मियाँले सो जग्गामा भोगचलन गर्न नदिई विवाद गरी कुटपिटसमेत गरेका थिए।
    सोही जग्गा विवादमा जमसैद मियाँले मृतक मिन्त्राका पति सकल बैठालाई प्रतिवादी बनाइ लिखत बदर मुद्दा दिएकोमा सकल बैठाको पक्षमा निर्णय भएपछि जमसैद मियाँले बैठालाई जग्गा भोगचलन गर्न नदिई मृतक मिन्त्रालाई ‘मेरो जग्गा हो, तिमीहरू जग्गा छोडिदेऊ’ भनी पटकपटक धाकधम्की दिने गरेका थिए।
    सोही जग्गाको रिसइवीको कारण जमसैद मियाँले योजना बनाइ ती व्यक्तिहरूको संलग्नतामा हत्या गरेको खुल्न आएको जिल्ला प्रहरी कार्यालय रौतहटले जनाएको छ।