ढोरपाटन (बागलुङ), ६ जेठ/रासस
बढ्दो बसाइँसराइका कारण बागलुड्ढो जैमिनी नगरपालिकाका ग्रामीण बस्ती सुनसान बन्दै गएका छन् । धमाधम स्थानीयले गाउँ छाड्न थालेपछि खेतीयोग्य जमीन बाझिंदै गएका छन् भने घर जीर्ण बन्दै गएका छन् । सेवासुविधाको खोजीमा गाउँबाट शहर बजार झर्ने प्रचलन बढेको हो । जिल्लामैं सबैभन्दा बढी बसाइँसराइ हुने पालिकाका रूपमा जैमिनीलाई लिइन्छ ।
जैमिनीबाट पछिल्लो दुई वर्षमा ४८२ घरपरिवारका एक हजार ७०९ जनाले गाउँ छाडेका छन् । विसं २०८० मा २६३ घरपरिवारका ९४७ जनाले बसाइँसराइ गरेका छन् भने विसं २०८१ मा २१९ घर परिवारबाट ७६२ जनाले गाउँ छाडेका छन् । दुई वर्षको अवधिमा २६ घरपरिवारका ८६ जना बाहिरबाट जैमिनी आएको नगरपालिकाले जनाएको छ । विसं २०८० वर्ष नौ परिवारका ४२ जना आए र विसं २०८१ मा १७ परिवारका ४४ जना जैमिनी आएका छन् ।
नगरपालिकाका पञ्जीकरण शाखा प्रमुख ताराप्रसाद पौडेलका अनुसार सबैभन्दा बढी वडा नं ८ र कम वडा नं ६ बाट बसाइँसराइ भएको छ । वडा नं ८ बाट दुई वर्षको अवधिमा १०७ घर परिवारबाट ४०३ जनाले बसाइँ सरेको पौडेलले जानकारी दिए । उनका अनुसार वडा नं १ बाट ४२ घरका १५७, वडा नं २ बाट ७७ घरका २५८, वडा नं ३ बाट ३४ घरका १०० र वडा नं ४ बाट ५२ घरका १९१ जनाले बसाइँसराइ गरेका छन् ।
यस्तै वडा नं ५ बाट २४ घरका ८३, वडा नं ६ बाट १४ घरका ५५, वडा नं ७ बाट ५४ घरका १८६, वडा नं ९ बाट ३९ घरका १२९ र वडा नं १० बाट ३९ घरका १४७ जनाले बसाइँसराइ गरेको पौडेलले बताए । जैमिनीबाट बसाइँसराइ गरेर अधिकांश चितवन, नवलपरासी र बुटवलमा गएको उनको भनाइ छ ।
नगर उपप्रमुख हरिहर शर्माले बसाइँसराइ रोक्नका लागि स्थानीयलाई गाउँमैं उद्यमी बनाउने र आत्मनिर्भर बनाउने खालका कार्यक्रम सञ्चालन गरिरहेको बताए । बस्तीबस्तीसम्म सडक, खानेपानी, विद्युत्, स्वास्थ्य, शिक्षा क्षेत्रको विकास गरेको उनको भनाइ छ । गाउँमा ठूलो सम्भावना हुँदाहुँदै पनि धेरैले शहर बजार रोज्ने गरेको शर्मा बताउँछन् ।
उनले भने, “मानिसका चाहना असीमित हुन्छन्, स्थानीय सरकारले गर्न सक्ने विकास गरिरहेका छौं, पर्याप्त नहोला तर गाउँमा पहिलेको जस्तो विकास नपुगेको भन्ने छैन, जताततै अहिले गाडी गुड्छन्, खानेपानीको सुविधा छ, शिक्षा र स्वास्थ्य क्षेत्रमा पनि ठूलो लगानी गरेका छौं, हुनेखानेहरू धेरैले शहर बजार रोज्न थाले, तर गाउँमा भएकालाई गुणस्तरीय सेवा प्रदान गर्न हामी प्रतिबद्ध छौं, नागरिकलाई उद्यमी बनाउने र आय आर्जनसँग जोड्ने खालका कार्यक्रम पनि चलाइरहेका छौं ।”
