स्वीट्जरल्यान्ड, एजेन्सी, ७ साउन/
जर्मनीलाई अन्डरडगको रूपमा हेर्न पाइने मौका धेरै कम हुन्छ, तर युरो–२०२५ को फाइनल प्रवेशका लागि जब उनीहरू स्पेनसँग खेल्दैछन्, त्यस बेला भने उनीहरू अन्डरडग नै हुनेछन् ।
स्पेन अहिलेसम्म महिला युरोपियन च्याम्पियनशिपको फाइनलमा पुग्न सकेको छैन, तर सन् २०२३ को विश्वकप विजेता टोलीले यस टुर्नामेन्टभरि उत्कृष्ट प्रदर्शन गरिरहेको छ र स्वीट्जरल्यान्डमा अपराजित रहने एकमात्र टोली पनि हो ।
आठपटकको विजेता जर्मनी भने टोलीको गहिराइको अभाव, समूह चरणमैं ठूलो हार र फ्रान्सविरुद्ध १० खेलाडीमा झरेपछि फर्केर पेनाल्टीमा जीत निकाल्नुपर्ने चुनौतीसँग जुध्नुपरेको अवस्थामा छ ।
तर स्पेनले क्वार्टरफाइनलमा स्वीट्जरल्यान्डलाई २–० ले हराए तापिनि उनीहरू जर्मनीसँग अघिल्ला दुई खेलमा पराजित भएका छन् । युरो २०२५ सेमिफाइनल नजीकिंदै गर्दा खेलका निर्णायक पक्षहरूको विश्लेषण हुँदैछ र कुन टोली विजयी हुनेछ भन्ने मूल्याङ्कन भइरहेको छ ।
खेलको शैलीमा ठोक्किनेछ फरकपन
स्पेनले युरो २०२५ भरि विस्तारपूर्ण र बल नियन्त्रणमा आधारित फूटबल खेलेको छ, जबकि जर्मनीको कथा फरक छ । फ्रान्सविरुद्धको क्वार्टरफाइनलमा क्याथ्रिन हेन्डरिकले १३औं मिनेटमैं रेड कार्ड खाँदा जर्मनी डिफेन्सिभ हुन बाध्य भयो र खेलमा उनीहरूले जम्मा २५.६ प्रतिशत मात्र बलको पकडमा रहे । यो स्तर जर्मनीका लागि सामान्यभन्दा निकै तल थियो, र अरू खेलहरूमा पनि उनीहरू बलको नियन्त्रणमा केन्द्रित रहेनन् ।
स्पेनले औसतमा ७३.५ प्रतिशत पोसेसन राखेको छ, यो युरो २०२५ मा सबैभन्दा धेरै हो । जबकि जर्मनीले ५३.६ प्रतिशत पोसेसन राखेको छ, जुन छैटौं स्थानमा पर्छ । स्पेनको पासिङ सटीकता, फाइनल थर्डमा पु¥याइएका पासको सङ्ख्या र कुल पासको सङ्ख्या सबै पक्षमा उनीहरू टुर्नामेन्टकै उत्कृष्ट टोली हुन् ।
औसतमा स्पेनले तेस्रो धेरै ‘बिग चान्स’ बनाएको छ भने जर्मनी यस पक्षमा दशौं स्थानमा छ । जर्मनीका प्रशिक्षक क्रिस्टियन वुकले उनको टोली ‘सास्ती सहने’ र बुधवारको खेलमा कम पोसेसनमा सीमित रहने बताएका छन्, तर उनले सही क्षणहरू पत्ता लगाउन काम गर्ने बताए । उनीहरूको सबैभन्दा ठूलो अवसर भनेको काउन्टर अट्याकमार्फत आक्रमण गर्ने उपाय फेला पार्नु हो, तर उनीहरूले बलविनाको समय धेरै सहनुपर्नेछ ।
“मलाई लाग्छ सबैलाई स्पेनका खेलाडीबारे थाहा छ,” वुकले भने, “उनीहरू सधैं एउटै शैलीमा खेल्छन्, छोटा पासहरू । हामीले उनीहरूलाई धेरै पछ्याउनुपर्नेछ, हामीसँग धेरै पोसेसन हुनेछैन र हामीले सास्ती भोग्नुपर्नेछ, तर हामीले सही समय फेला पारेर त्यसको फाइदा लिनुपर्छ र आफ्नो खेल अगाडि बढाउनुपर्छ ।”
