बलिराम शुक्ल, बिरुवागुठी, २४ वैशाख/
कृषि सामग्री कम्पनी लिमिटेड वीरगंजले समयमा युरिया मल वितरण नगर्दा चैते धानखेती गरेका पर्सेली किसानहरू मलको समस्या झेलिरहेका छन् ।
पर्साको गण्डक नहरदेखि उत्तर थरुहट क्षेत्रका किसानहरूले चैते धानखेती गरेका छन् । धान रोपेको २१ दिनपछि उनीहरूलाई मलको आवश्यकता पर्छ । धानखेती गर्दा र त्यसको २१ दिनपछि युरिया मल आवश्यक हुन्छ तर किसानलाई आवश्यकता परेको बखत मलको आधिकारिक विक्रेता कृषि सामग्री र साल्ट ट्रेडिङ कम्पनीमा मलको अभाव हुने गर्छ । कुनै पनि बालीको बखत आवश्यक मल पाइन्न र अहिले पनि थरुहट क्षेत्रका किसानहरू यही नियति भोग्दैछन् । यहाँका किसानहरू आवश्यक परेको बखत सीमावर्ती क्षेत्र भारतीय बजारबाट महँगो मूल्यमा मल खरीद गरेर आवश्यकता पूर्ति गर्दै आएका छन् र अहिले पनि यही गरिरहेका छन् ।
कृषि सामग्री र साल्ट ट्रेडिङमा मल अभाव भएकाले सहकारी संस्थालाई वितरण गरिएको छैन । अहिले सहकारीहरूले मल अभाव देखाउँदै आएका छन् । केही व्यापारीहरूले पुरानो सञ्चित र भारतबाट अवैधरूपमा ल्याएर भण्डारण गरेको मललाई महँगो मूल्यमा वितरण गरिरहेका छन् । स्थानीय पालिकाहरू भने यस्तो कार्य हुँदा पनि चुपचाप छन् ।
चुनावको बखतमा मात्र किसानहरूको बारेमा बोल्ने नेताहरू अहिले मलको अभाव झेल्दै गरेका किसानहरूको बारेमा चुप लागेर बसेका छन् । किसानहरूलाई सहज मल प्राप्तिका लागि पनि जनप्रतिनिधिहरूको पहल देखिएको छैन । सहुलियतमा मल उपलब्ध गराउने उनीहरूको वाचा झूटा साबित हुँदैछ । जनप्रतिनिधिहरूले पालिकाहरूमा आउने मलबारेमा चासो देखाउँदैनन् । सहकारीमा आउँदा उनीहरूले आफन्तहरूकै बढी सिफारिश गर्छन् । आम किसानहरूको हकमा बोल्दै बोल्दैनन् ।
पर्सागढी नपा–३ का किसान लालबहादुर बस्नेतले मल नपाएको गुनासो गरे । उनले अहिले आकाशे वर्षा भएको र चैते धानखेती गरेका किसानहरूलाई मलको आवश्यकता भएकोमा मल अभाव हुँदा समस्या भएको बताए । उनले भारतीय बजारबाट चर्काे मूल्यमा मल खरीद गरेर किसानहरूले खेतमा छरिरहेको बताए । किसान बस्नेतले यस वर्ष वर्षा समयमा भएर सिंचाइ राम्रो भएपनि मल अभावमा चैते धान बिग्रने हो कि भनी चिन्ता जाहेर गरे ।
कृषि सामग्री कम्पनी लिमिटेड वीरगंजका प्रवक्ता पुरुषोत्तम सिंहले वैशाख १९ गतेसम्म वीरगंजमा युरिया मल ४५३९.५५० मेट्रिक टन अल्या र ४२४५.३५० मेटन मौज्दातमा रहेको बताए । यसैगरी, डिएपी ५८०४.७५० अल्या र ५६१२.१५० मेटन मौज्दात रहेको बताएका छन् ।
