नितेश कर्ण, वीरगंज, २४ वैशाख/
नेपाल र भारतको खुला सीमामा हिजो मङ्गलवारदेखि दुवैतर्फका सुरक्षाकर्मीहरूले कडाइ गरेका छन् । दुई साता अघि भारतको जम्मु–कश्मीरस्थित पहलगाममा भएको आतङ्की हमलापछि सीमा क्षेत्रमा सुरक्षाकर्मीहरूले कडाइ थालेका थिए ।
दुवैतर्फबाट आवतजावत गर्नेहरूलाई निगरानीमा राख्ने, शङ्कास्पद गतिविधि हुन नदिन कडाइ गरिएकोमा हिजो रातिदेखि भारतले आफ्नो सीमामा सुरक्षा बढाएको छ । प्रशिक्षित कुकुरसहित सीमा सुरक्षा बल (एसएसबी)को सङ्ख्या बढाएर शङ्कास्पदहरूसँग परिचयपत्र हेर्ने कार्य शुरू गरेको छ । शङ्कास्पद व्यक्तिहरूले आफ्नो परिचय देखाएको खण्डमा मात्र आवतजावत गर्न दिइएको छ ।
आज मध्यरात १ बजेदेखि १ः३० बजेसम्म भारतले पाकिस्तानमा ‘अपरेशन सिन्दूर’ शुरू गरेको थियो । यस अघि हिजोदेखि वीरगंज–रक्सौल सीमाका साथै पर्सा जिल्लाका विभिन्न खुला नाकामा सुरक्षा बढाएको थियो ।
आज जिल्ला पदाधिकारी दिनेशकुमार राय, पुलिस अधीक्षक डा शौर्य सुमनसहितको टोलीले पर्सा जिल्लासँग जोडिएका भारतीय सीमा क्षेत्र इनर्वा, नगरकटियागंजलगायतमा स्थलगत निरीक्षण गरेका छन् ।
उनीहरूले एसएसबीलाई हाइअलर्टमा रहन र २४सैं घण्टा गस्तीसहितको सुरक्षा गर्न निर्देशन दिएका थिए । उनीहरूले नेपाली सुरक्षाकर्मीहरूसँग पनि भेट गर्दै अहिलेको अवस्थामा नेपालबाट आउने र भारतबाट जाने व्यक्तिहरूमाथि विशेष निगरानी गर्न आग्रह गरेका थिए ।
