पर्सागढीमा ९ सय भुस्याहा कुकुरलाई खोप

77

प्रस, पर्सागढी, २ माघ/
पर्सागढी नगरपालिकाको आर्थिक सहयोगमा तराई नेपाल संस्थाले नगर क्षेत्रका भुस्याहा कुकुरलाई रेबिजविरुद्धको खोप अभियान अन्तिम चरणमा पुगेको छ।
तराई नेपाल संस्था बाराकी प्रमुख ममता साहले ९ वटा वडामध्ये दुईवटा वडामा मात्र खोप दिन बाँकी रहेको बताइन्। उनले नगरपालिकाका १४ सय भुस्याहा कुकुरलाई रेबिजविरुद्ध खोप दिने कार्यक्रम रहेकोमा अहिलेसम्म ९ सय भुस्याहा कुकुरलाई खोप दिइसकिएको बताइन्।
प्रमुख साहले वडा नं ५ र ९ मा मात्र खोप दिन बाँकी रहेको बताइन्।
बन्ध्याकरणमा समस्या
पर्सागढी नगरपालिकाले भुस्याहा कुकुरविरुद्धको अभियान अन्तर्गत पहिलो चरणमा खोप र त्यसपछि बन्ध्याकरण गर्ने योजना बनाए पनि अहिले यो योजनामा समस्या देखिएको छ।
बन्ध्याकरण गर्ने प्राविधिकको व्यवस्थापन नगरिएकोले बन्ध्याकरणमा तत्काल समस्या देखिएको छ। प्रमुख साहले खोप सकिए लगत्तै भाले र पोथी कुकुरको तथ्याङ्क बनाउने र सोहीअनुरूप बन्ध्याकरण गर्ने बताइन्।
बन्ध्याकरणको लागि नगरपालिकासँग छुट्टै सम्झौता हुनुपर्ने र सोहीअनुरूप तयारी भइरहेको जानकारी पनि उनले गराइन्। भुस्याहा कुकुरलाई खोप दिन संस्थाले तीनजना पशु स्वास्थ्यकर्मीलाई खटाएको छ।

एक उत्तर छोड्न

कृपया आफ्नो टिप्पणी प्रविष्ट गर्नुहोस्!
कृपया आफ्नो नाम यहाँ प्रविष्ट गर्नुहोस्