पोखरियामा फास्टफूड व्यवसाय फस्टायो

221

धर्मेन्द्र चौरसिया, पोखरिया, १३ पुस/
पर्सा जिल्लाको वीरगंज महानगरपालिकामा मात्र सीमित फास्टफूड (खाजा) व्यवसाय अहिले पोखरियामा पनि फस्टाएको छ। यसका व्यवसायीहरूले मनग्य आम्दानी गरिरहेका छन्।
पोखरिया नगरपालिकामा परिणत भएपछि चहलपहल बढेसँगै फास्टफूडको व्यापार पनि फस्टाएको हो। एक वर्षदेखि पोखरियामा फास्टफूडका सातवटा ठेला सञ्चालनमा छन्। उनीहरूको दैनिक बिक्री १० देखि १५ हजार र आम्दानी २–३ हजार रुपैयाँ हुने गरेको छ। ठेलामा अन्डा, रोस्ट, एगरोल, चाउमिन, पानीपुरी, चाट, छोला–भटुरा, मिठाइ आदि खाद्यवस्तु बिक्री गरिन्छ। एक वर्ष पहिले पोखरियामा ठेलामा राखेर फास्टफूडको बिक्री हुँदैनथियो। शहरोन्मुख पोखरियामा भारतीय तथा स्थानीय व्यवसायीहरूले फास्टफूड व्यवसाय शुरू गरेका छन्।
जगरनाथपुर गापाको बिजवनिया निवासी विजय साह कानूले एक वर्षदेखि फास्टफूड बिक्री गरेर पोखरियामा घर बनाएर बसेका छन्। उनले दैनिक रु २–३ हजार आम्दानी हुने गरेको बताए।
भारतका मुन्ना महतो नूनिया, रोशन गुप्ताले पनि ठेलामा फास्टफूड बिक्री गर्छन्। उनीहरूको बसाइ अहिले पोखरियामा छ। पोखरियामा फास्टफूड लोकप्रिय भएपछि वीरगंज, नगवाका मानिसले पनि ठेला लगाउन थालेका छन्। पोखरिया, सतवरियाका व्यवसायीले पनि ठेलामा फास्टफूड बिक्री गर्न थालेका छन्। पोखरियामा आइतवार र बिहीवार बजार लाग्छ। पहिले बजारकेन्द्रित व्यवसाय मात्र चल्ने गरेका थिए।
अहिले नगरपालिका घोषित भएपछि सरकारी कार्यालय, बैंक, वित्तीय संस्थालगायतका कार्यालयहरू स्थापना भएपछि बजारमा मानिसहरूको चहलपहल बिदाबाहेकका दिनमा बढी हुने गरेको छ।
फास्टफूड अन्य खाजाभन्दा स्वादिष्ट र चाँडै तयार हुने भएकोले अहिले थुप्रैले यो खाजालाई रुचाएको देखिन्छ।

एक उत्तर छोड्न

कृपया आफ्नो टिप्पणी प्रविष्ट गर्नुहोस्!
कृपया आफ्नो नाम यहाँ प्रविष्ट गर्नुहोस्