खुलेका विद्यालयमा सुरक्षा मापदण्ड फितलो

131

प्रस, पंचगावाँ, १३ पुस/
पर्सा जिल्लाको जगरनाथपुर गाउँपालिकाबाहेक ते–हवटै स्थानीय तहमा विद्यालय सञ्चालन भएपनि स्वास्थ्य सुरक्षा मापदण्ड अपनाउने विषयमा लापरवाही देखिएको छ।
स्थानीय पालिकाको स्वीकृतिमा विद्यालय सञ्चालन गर्न सरकारले निर्देशन गरे पनि थुप्रै पालिकामा शिक्षक, अभिभावकको सहमतिमा विद्यालय सञ्चालन भएका छन्। शिक्षक, अभिभावकको सहमतिमा सञ्चालित विद्यालयहरूमा पालिकाले स्वास्थ्य सुरक्षा मापदण्ड पूरा गर्नेतर्फ चासो देखाएको छैन। विद्यालयहरूमा साबुन, पानी, सेनिटाइजर र मास्कको व्यवस्था नगरेरै सञ्चालनमा आएका छन्। विद्यालय प्रशासनले सक्दो प्रयास गरे पनि पालिकाले ध्यान दिएको छैन।
जीराभवानी गापा र बहुदरमाई नगरपालिकामा शिक्षक, अभिभावकको भेलाले विद्यालय सञ्चालनमा ल्याएको हुँदा त्यहाँ स्वास्थ्य सुरक्षा मापदण्डको अभाव छ।
जीराभवानी गापाका शिक्षा प्रमुख जीतेन्द्र मिश्रले सञ्चालित विद्यालयहरूमा स्वास्थ्य सुरक्षाको मापदण्ड पूरा गर्न सामग्री व्यवस्थापन यथाशीघ्र गरिने बताए।
यसैगरी, बहुदरमाई नपाका स्वास्थ्य संयोजकले अनुगमन गरेर सामग्री उपलब्ध गराउने बताए।
बाल विकास कक्षा पनि सञ्चालन
पटेर्वासुगौली, जीराभवानी, ठोरी गापाले बाल विकासदेखि कक्षा १२ सम्मको अध्ययन शुरू गरेका छन्। बिहान ६ देखि ११ बजेसम्म कक्षा ११ र १२ तथा १० देखि ४ बजेसम्म अन्य कक्षाहरू सञ्चालनमा छन्। दुई चरणमा विद्यालय सञ्चालन भएपनि सरकारले तोकेको मापदण्ड अनुसार दूरी कायम गर्ने, मास्क लगाउने र साबुन–पानीले हात धुने कार्यमा लापरवाही बढ्दो छ।

एक उत्तर छोड्न

कृपया आफ्नो टिप्पणी प्रविष्ट गर्नुहोस्!
कृपया आफ्नो नाम यहाँ प्रविष्ट गर्नुहोस्