बैंक पूर्ण सञ्चालनमा प्रशासनको असहयोग, गेटमा आएका ग्राहकलाई सेवा दिंदै वीरगंजका बैंकहरू

0
40

प्रस, वीरगंज, २३ भदौ/
    वीरगंजका बैंकहरू पूर्ण सञ्चालनमा स्थानीय प्रशासनले सहयोग नगरेको आरोप लागेको छ।
    जिल्ला प्रशासन कार्यालय, पर्साले वीरगंजका ‘क’वर्गका २७ वटा बैंकका शाखालाई सञ्चालन गर्न सहज वातावरण बनाउन सहयोग नगरेको बैंकका कर्मचारीहरूले बताए।
     “प्रशासनले बैंक नखोल्न भनेको छ, तर पनि गेटमा आएका ग्राहकहरूलाई हामीले फिर्ता पठाएका छैनौं,” बैंकर एशोसिएशन अफ वीरगंजका एकजना सदस्यले भने, “अवस्था त्रासपूर्ण छ, तर पनि प्रशासनको निर्देशन अटेर गरेर अति आवश्यक सेवा जारी राखेका छौं।”
    सेवाग्राही बैंकको लागि भगवान् भएको चर्चा गर्दै उनले सेवाग्राहीको पीरमर्का बुझिदिने र उसले राखेको रकम आवश्यकता परेको समयमा झिक्न दिइएन भने उसको मानव अधिकार र बैंक सेवाको मर्मविपरीत हुने भएकोले वीरगंजका अधिकांश बैंकले बिहान १० देखि दिउँसो २ बजेसम्म आंशिक सेवा दिइरहेको बताए।
    २७ वटा बैंकका शाखामध्ये ५० प्रतिशत शाखा दैनिकरूपमा खुलिरहेको छ भने अन्य ५० प्रतिशत बैंकले आलोपालो गरेर सेवा उपलब्ध गराइरहेको बैंकका एकजना प्रबन्धकले बताए। वीरगंजका एक सरकारी बैंकका प्रबन्धकले भने, “वीरगंजका विभिन्न बैंकमा कोरोना छिरिसकेको छ, दुर्ई दर्जनभन्दा बढी बैंकका कर्मचारी सङ्क्रमित भइसक्दा पनि हामीले सेवा बन्द गरेका छैनौं। प्रशासनले बैंकको गेटमा सुरक्षा व्यवस्था मिलाउनुपर्ने तथा कर्मचारीको आवागमन एवं उनीहरूको स्वास्थ्य परीक्षणको लागि नीतिगत प्रतिबद्धता भएको खण्डमा बैंकका कर्मचारीको मनोबल उच्च हुन्थ्यो र बैंकले सहजरूपमा सेवा दिन सक्थ्यो।”
    अहिले कतिपय बैंकका सवारीसाधनलाई रकम वा कर्मचारी लिन जाँदा प्रहरीले ठाउँ–ठाउँमा रोकेर हैरान गर्ने गरेको उनले बताए। प्रशासनले भदौ २५ गतेसम्म लगाएको पाँचौं चरणको निषेधाज्ञाले वीरगंजको आर्थिक अवस्था जर्जर बनेको छ। उद्योग–व्यापार चौपट भएको छ भने आर्थिक गतिविधिको मुख्य कडी अर्थात् बैंकिङ सेवा पनि प्रभावित हुँदा पर्सा, बारा, रौतहटका ग्राहक मर्कामा परेका छन्।
यी बैंकमा भेटियो कोरोना सङ्क्रमण
    वीरगंजमा कोरोना समुदायस्तरमा फैलिए पनि अहिले नियन्त्रणको अवस्थामा आइपुगेको छ। अहिले सङ्क्रमण दर कम छ। तर पनि वीरगंजका बैंकहरूमा कोरोना सङ्क्रमित भेटिने क्रम बढ्दै गएको छ।
    वीरगंजका विभिन्न बैंकमा गरी करीब ३ दर्जन कर्मचारीमा कोरोना सङ्क्रमण पुष्टि भएको बताइएको छ। नबिल बैंक श्रीपुर शाखामा ११ जनामध्ये ९ जनामा र आदर्शनगर शाखामा ३३ जनामध्ये १५ जना गरी बैंकका प्रबन्धक नितिन नन्दवानासहित २४ जना सङ्क्रमित भएका छन्।
    यसअघि, ग्लोबल आइएमई बैंकका ३ जना, एनआइबिएलका २ जना, एभरेस्टका १ जना, एसबिआईका २ जना, प्रभु बैंकका १ जनामा कोरोना सङ्क्रमण भेटिएको बैंकर एशोसिएशन अफ वीरगंजले जनाएको छ।

एक उत्तर छोड्न

कृपया आफ्नो टिप्पणी प्रविष्ट गर्नुहोस्!
कृपया आफ्नो नाम यहाँ प्रविष्ट गर्नुहोस्