सवारीसाधन सञ्चालनमा कडाइ, बिरामी मर्कामा

0
47

विमला गुप्ता, वीरगंज, ३० साउन/
निषेधाज्ञा जारी भएको २१औं दिनदेखि पर्सा प्रहरीले सवारीसाधन सञ्चालनमा कडाइ गरेको छ।
साउन १० गते निषेधाज्ञा लागू गरेदेखि सवारीसाधन सञ्चालनमा खासै ध्यान नदिएको पर्सा प्रहरीले शुक्रवार बिहानदेखि वीरगंजका ठाउँ–ठाउँमा सवारीसाधन चेकजाँचमा कडाइ ग–यो। जसले गर्दा घण्टाघर क्षेत्रमा ४/५ दर्जन मोटरसाइकल नियन्त्रणमा लिइयो। प्रहरीले निषेधाज्ञा जारी गर्दा तोकिएको मापदण्डविपरीत सवारीसाधन चलाउनेहरूलाई नियन्त्रणमा लिएको थियो। सुरक्षाकर्मी, स्वास्थ्यकर्मी, सञ्चारकर्मी, विद्युत्, टेलिफोन, इन्टरनेट, सरसफाइमा प्रयोग हुने सवारीसाधनबाहेक अन्यको चेकजाँच गरेर नियन्त्रणमा लिएको थियो।
आज एक्कासि प्रहरीले सवारीसाधन सञ्चालनमा कडाइ गरेको हो। प्रहरीले कडाइ गरेको कारण कतिपय मानिसलाई अस्पताल, प्रयोगशालामा जान समस्या भएको थियो। प्रहरीको चेकजाँचको क्रममा चिकित्सककहाँ उपचारको लागि जाने क्रममा बारा, रामपुरटोकनी निवासी भैरव प्रसादलाई छोराको उपचारमा समस्या भयो। उनको छोरा प्रकाश साह कानू ५ वर्षदेखि गठिया रोगबाट पीडित छन् र उनको उपचार गर्न डा रोशन अलिको अलि ट्रमा सेन्टरमा आउने क्रममा आज ११ बजे प्रहरीले उनलाई अस्पतालसम्म जान नदिएको भैरवले गुनासो गरेका छन्।
पावरहाउस र मुर्ली चोकका प्रहरीले चिकित्सकको पुर्जी देखाउँदा पनि मुख्य सडकबाट जान नदिएको बताए। प्रहरीले रोकेपछि सहायक सडकबाट जानुपरेको उनले बताए। छोरालाई गठियाको समस्याले पिरोलेको हुँदा बाध्य भएर सहायक सडकबाट जानुपरेको उनले बताए। एउटा जिल्लाबाट अर्को जिल्लामा जान निषेध भएको कारण बारा घर भएकोले आफूलाई रोकिएको उनले बताए। तर उपचारजस्तो संवेदनशील विषयमा प्रहरीले समस्या नबुझेको उनको गुनासो थियो।
सङ्क्रमण समुदायस्तरमा फैलिएपछि अहिले कोही पनि विनाकाम घरबाहिर निस्किएका छैनन्। यो कुरा प्रहरीले बुझ्नुपर्ने उनको भनाइ थियो।
निषेधाज्ञाको समयमा दुवै जिल्लाका प्रशासनले जारी गरेको सूचनामा पनि बिरामी र औषधि खरीदका लागि रोक नलगाउन भनिएको छ। तर साउन १० गतेपछि एक्कासि तातेको पर्सा प्रहरीले आज सबैखाले नियमलाई एकैसाथ पालना गराउन खोज्दा समस्या भएको थियो।

एक उत्तर छोड्न

कृपया आफ्नो टिप्पणी प्रविष्ट गर्नुहोस्!
कृपया आफ्नो नाम यहाँ प्रविष्ट गर्नुहोस्